Мемлекет басшысы бішкекте

Қазақстан мен Қырғызстан өзара өңіраралық қарым-қатынасты дамытады. Бүгін мемлекет басшысының Бішкекке жасаған ресми сапары барысында оннан астам құжатқа қол қойылды, соның ішінде Алматы мен Ыстықкөл, Түркістан мен Ош, Жамбыл мен Талас аймақтарының арасын жақындастыру туралы келісімдер бар. Кездесу барысында сауда-интерграция жағына бас мән берілген. Себебі өзара тауар айналымы өткен жылы 1 млрд долларға жеткен.

Бүгін таңертең еліміздің нөмірі бірінші борты Манас халықаралық әуежайына қонды. Президентті Қырғызстанның премьер-министрі Ақылбек Жапаров күтіп алды. Осыдан кейін Ала-Арча сарайында Қырғыз президенті Садыр Жапаров сән-салтанатымен мәртебелі мейманды қарсы алды. Қос президент әуелі екеуара әңгімелесіп, саяси, сауда-экономикалық, инвестициялық, мәдени-гуманитарлық мәселелерді талқылады. Шағын құрамдағы жүздесу кеңейтілген жиынға ұласты. Бас қосуға негізгі себеп екі ел арасында дипломатия орнағынына 30 жыл дейді мемлекет басшысы.

Қасым-Жомарт Тоқаев – ҚР президенті:
«Бірқатар уағдаластыққа қол жеткіздік. Біз сауда-экономикалық байланыстарды нығайтуға баса мән бердік. Қазір әлемдегі ахуал күрделі екенін білесіздер. Осындай қиын кезеңде күш жұмылдыру өте маңызды. Қазақстан — Қырғыз елінің негізгі сауда және инвестиция саласындағы серіктесінің бірі»

Қазақ пен қырғыз елі ауылы аралас, қойы қоралас ежелден құдандалы, бауырлас халықтар. Бүгінде Қазақстан Қырғыз елінің ең ірі экономикалық әріптестерінің бірі. Соңғы 15 жылда 1 млрд доллардан астам инвестия құйған. Қос елде бірлескен 600-дей кәсіпорын жұмыс істеп тұр. Жыл санап алыс-беріс көбейіп келеді. Келіссөздер қорытындысы бойынша Қасым-Жомарт Тоқаев пен Садыр Жапаров екіжақты ынтымақтастықты мейлінше жаңа деңгейге көтеруге, серіктестікті одан әрі жандандыруға қатысты 10 құжатқа қол қойды.

Сапар Жапаров – Қырғыз республикасының президенті:
«Бауырлас елдеріміз тығыз ынтымақтастықта. Біздің мемлекеттер арасында тіпті аймақтық деңгейде түсініспеушілік жоқ. Біздің қарым-қатынасымыз абсолютті достық рухында дамып келеді».

Жалпы қол қойылған құжаттардың ішінде қауіпсіздік, ауыл шаруашылығы, авиациялық құтқаруға қатысты келісімдер бар. Мемлекет басшысының айтуынша, екіжақты және көпжақты форматтағы қарым-қатынастар жалғасады. Осылайша қазақ пен қырғыздың саяси, сауда-экономикалық, энергетикалық салаларда бірлесе атқаратын шаруасы көбейді.