Түркістан облысында жыл басынан бері КВИ-ге қарсы талаптарды сақтамаған 400-ге жуық отбасылық, мерекелік іс-шаралар ұйымдастырылған.
Ал инфекцияның болжамды жұқтыру көздерін анықтау барысында, қауіпті кеселді жұқтырғандардың 75%-ға жуығы инфекцияны мерекелік, отбасылық шаралар кезінде, көпшілік орындарда жұқтырғандары белгілі болған.
Осы орайда, Түркістан облысының әкімі Өмірзақ Шөкеев мобильді топтардың жұмыс көрсеткішін күшейтуді тапсырды.
«Қайтадан белең алып бара жатыр ауру. Мониторинг емес, тексеруді күшейту керек. Көріп отырмын, кей аудандарда айқайлап тұрып той жасап жатыр. Беташары болсын, басқасы болсын. Қадам бассаң, барлық жерде той болып жатыр. Елдегі эпидемиологиялық жағдайды біле тұра, той жасағандарды тоқтату керек»,-дейді облыс басшысы.
Айта кетейік, бүгінгі таңда облыс бойынша мобильді топтар және Полиция қызметкерлері тарапынан СЭБ басқармаларына 4 мыңға жуық баянат түскен. Оның 3 мыңға жуығына әкімшілік хаттама толтырылып, 160 млн.теңгеге айыппұл салынған.
Карантин режимін бұзған 31 нысанның жұмысын тоқтату бойынша талап арыздар сотқа өткізілсе, соттың шешімімен 16 нысанның жұмыс тоқтатылған. Қалған 15 талап арыз бойынша материалдар әлі сотта қаралуда.
РЕДАКЦИЯНЫҢ МЕКЕНЖАЙЫ:
